Fréttir

Stjórnandinn má ekki láta eigin símenntun sitja á hakanum, að sögn Katrínar S. Ólafsdóttur framkvæmdastjóra Hagvangs. „Í dag þurfa stjórnendur fyrirtækja að vera svo mörgum vopnum búnir enda verðu viðskipta- og rekstrarumhverfið æ flóknara og sjaldan eða aldrei reynt jafnmikið á að stjórnandinn sé fær og með breiða þekkingu," segir Katrín. „Síðustu ár hafa margir stjórnendur verið svo hlaðnir störfum, og oft þurft að leggja allan sinn tíma og orku í að bjarga rekstri fyrirtækja sina, að þeir hafa ekki getað sinnt sjálfum sér nógu vel."

Enn eimir ögn eftir af þeirri gömlu hugmynd að stjórnandinn eigi að vera alvitur og óskeikull allt frá fyrsta degi. Katrín segir þetta vera að breytast. „Stjórnendur í dag eru miklu meðvitaðri uma ð þeir þurfa á ákveðinni aðstoð að halda og hafa þörf fyrir stöðuga þjálfun á ýmsum sviðum. Mörg fyrirtæki átta sig líka á því að þjálfun stjórnendateymisins hefur áhrif niður á við í fyrirtækinu og aukin þekking og bætt vinnubrögð dreifast á milli starfsfólks. Eftir höfðin dansa limirnir, eins og sagt er."

Þá segir Katrín að það sé fullkomlega eðlilegt að stjórnandi verði að bæta við sig menntun og þjálfun þegar hann tekur við stjórnartaumunum í nýju fyrirtæki. „Það er óhjákvæmilegt að stjórnandi á eftir að rekast á nýjar áskoranir og ný tækifæri sem ekkert var fjallað um í kennslubókunum og námskeiðunum sem hann hefur áður setið," segir hún. „Og ekki bara að stjórnandinn verði að bæta við sig menntun til að stýra fyrirtækinu, heldur líka til að aðlagast breyttum ytri aðstæðum. Þannig held ég að umhverfi fyrirtækja á Íslandi hafi breyst svo mikið á síðustu árum að sú reynsla og þekking sem menn öfluðu sér áður -jafnvel þó þeir hafi verið meira en áratug í forstjórastólnum- á ekki endilega við þennan nýja veruleika."

Sama segir Katrín að gildi um aðra starfsmenn: viðskiptaumhverfið er svo breytt að oft er mjög áríðandi að læra allt önnur vinnubrögð. „Símenntun er aldrei mikilvægari en einmitt á svona umbreytingatímum, þegar allir þurfa að vera á tánum," segir hún en bætir líka við að þjálfunin geti hreinlega hjálpað fólki að þrauka við erfiðar aðstæður. „Mörg okkar hafa þurft að ganga í gegnum mikla erfiðleika síðustu ár. Auk þess að fríska upp á þekkinguna þurfa margir að öðlast betri tæki í streitustjórnun og hlúa að þessu mannlega áður en hægt er að taka slaginn af fullum krafti. Það má bera þetta saman við hversu mikil áhersla var á tölvulæsi í atvinnulífinu síðasta áratuginn og rúmlega það. Vitaskuld þarf fólk að kunna að not tölvur í dag, en kannski er ekki síður mikilvægt ef reksturinn á að vera kröftugur og lipur að starfsfólkið sé með góðan undirbúning fyirr andlega þáttinn sem reynir á í daglegum störfum. Víða er keyrt á algjörum lágmarksmannafla, álagið er mun meira og samkeppnin harðari en nokkru sinni. Að eiga samstillta liðsheild og fima stjórnendur getur verið það sem skilur á milli feigs og ófeigs."

Þegar góðærið stóð hvað hæst áttu fyirtækin í litlum vandræðum með að borga fyrir símenntun. „Rausnarleg þjálfun var víða hluti af aðferðum fyrirtækja til að halda í og laða að besta starfsfólkið og miklu kostað til. Núna er miklu betur fylgst með öllum upphæðum og lykilorðið í allri þjálfun að hún sé hagkvæm og árangursrík."

Katrín segir ekki skynsamlegt að fella alla þjálfun og fræðslu niður, en óhætt ætti að vera að sýna aðhald og ráðdeildni þegar kemur að þessum útgjaldalið. „Ég þekki til fyrirtækja sem ráðstafa gagngert ákveðinni upphæð til símenntunnar hvers starfsmanns en hafa farið þá leið að minnka upphæðina frekar en að skera alveg niður," segir hún. „Aðrir leita praktískari leiða eins og að fá leiðbeinendur á vinnustaðinn svo ekki þurfi að senda starfsfólkið burt um langan veg með tilheyrandi kostnaði. Enn aðrir nýta sér möguleika eins og námskeið sem hægt er að stunda yfir netið með bæði lítilli fyrirhöfn og litlum tilkostnaði."

Hluti af starfsemi Hagvangs er ráðningarþjónusta. Katrín segir ljóst að menntun skiptir í dag miklu máli fyrir atvinnumöguleika fólks og öll viðbótarþekking og þjálfun teljist umsækjendum til tekna. „Þetta er mikil breyting frá þvi sem áður var, þegar þótti nóg að fólk hefði t.d. ákvðena undirstöðumenntun n.v. á því sviði sem starfið kallar á. Núna skoða vinnuveitendur mjög gaumgæfilega hvað fólk hefur lært og vega og meta hvernig uppsöfnuð þekking umsækjandans getur gagnast í rekstrinum."

Viðtalið birtist í Viðskiptablaði Morgunblaðsins 22. september 2011